Mi tin gana di sa 

si den otro paisnan
nan ta toka tumba òf tambú
den nan aktividatnan
sosial òf kultural

Mi tin gana di sa
si den otro paisnan
nan ta baila nos ritmonan
den nan fiestanan
na kas òf den klup

Mi tin gana di sa
si den otro paisnan
instansianan ofisial
ta finansiá akontesimentu
ku no ta parti di nan kultura

Mi tin gana di sa
si den otro paisnan
hóbennan por baila
ritmonan di otro kultura
pero no esnan di nan mes

Mi tin gana di sa
dikon mi no por komprondé
kon ta toka otro ritmonan
den nos marcha di karnaval
miéntras tin sufisiente tumba

Mi tin gana di sa
ki dia nos ta kuminsá
duna balor i rèspèt berdadero
na nos propio kultura
pa asina kuid’é i engrandesé

Mi tin gana di sa
ki dia e poema aki
ta pèrdè tur su balor
i hasi mi felis i kontentu
pasombra nos a emansipá

Hensley F. Koeiman,
Curaçao